Youtube-a thu dik lo thehdarh chungchang DC-in a sawifiah; legal action lâk tum lo
Saitual bawrhsap Dr Lalngura Tlau chuan, Lok Sabha inthlanpui 2024 kaihhnawiha Saitual district-a sorkarin lirthei a hman man pawisa inpek danah inrem lohna a awm loh thu a sawi a; thu dik lo thehdarhtu Khawlbawm Youtube channel lakah dan hmanga hmalak (legal action) an tum rih loh thu a sawi bawk.
Lok Sabha inthlana lirthei hman man inpek danah inrem lohna awm anga Khawlbawm Youtube channel-in a tihchhuah chungchangah hian nimin khan district election officer Dr Lalngura Tlau, bawrhsapin chanchinbumite a kâwm a ni.
Dr Lalngura Tlau chuan, tun hnaiah Youtube channel Khawlbawm-in Saitual district-a Lok Sabha inthlan buatsaihnaa lirthei an hmante an inrem dan ni loa a man inpek a awm ni âwmin a tarlang tih a sawi a, "He thil thleng hi a pawi hle a, social media-a thil a kimchang hre loa kan chhuah mai ṭhin hian nghawng nasa tak a thlen thei a ni," a ti a; driver-te hnenah an inremna angin pawisa an pek tawh thu a sawi.
Khawlbawm channel neitu Lalhmingsanga (Hmingtea), Lunglei Farm Vengin a video a paih tawh thu leh sawifiahna video a tihchhuah tawh thu sawiin DC chuan, "Tun dinhmunah chuan tu chungah mah legal action lak tumna a awm rih lo. Amaherawhchu, hetiang thil a awm leh chuan court-ah kalpui a ngai tawh ang," a ti.
Saitual DC sawi danin, Lok Sabha inthlanah khan Maxicab Owners Association-te chu inremna siampui an ni a; inremna ang chuan lirthei pakhatah ni khatah Rs 6,000 leh kilometre khatah Rs 40 (actual kilometre) zel inpe tura inremna ziah a ni a; an inremna angin pawisa an pe a ni.