Chhawr zuina tur hmuh loh vangin muster roll teacher-te an mangang

Mizoram sorkarin kum 2019-a zirtirtu indaih lohna avanga a lak muster roll (MR) zirtirtute chu tunlai hian an mangang hle nia thu dawn a ni.

Vanglaini thu dawn danin, MR teacher-te hian kum dangah chuan chhawr zawm an nihna tur, engagement order chu February thla chhungin an hmu ṭhin a, kuminah chuan nimin thleng khan engagement order an la hmu lo.

MR teacher-te hi kum khat (March to February) zel atan engagement order pek ṭhin an ni a; kum 2023-24 atana rawih an nihna a tawp tawh a, kum 2024-25 atana rawih an nihna tur an la hmu lo. Engagement order a la chhuah loh avangin March 2024 hlawh pawh an la la lo a ni.

MR teacher hruaitute chuan, engagement order chhuah loh chungchangah hian chief minister Lalduhoma leh School Education minister Dr Vanlalthlana an hmu tawh a; mahse, engagement order tihchhuah a la ni lo. Hetih lai hian, sikul kal chhunzawm tawh lo tura tih pawh an ni chuang lo.

Thu dawnnain a sawi danin, MR zirtirtute chu engagement order awm loa sikul kal reng an phûr tawh lo. Lok Sabha inthlanah khan an zinga mi eng emaw zat chu polling official atan hman an ni a, duty-a chhuah loh mai an tumin, an pawl hruaitute'n sorkar ngaichâng a, thuawih taka awm phawt tura an ngen angin an duty a ni.

Zirtirtu ṭhenkhat chu engagement order an hmuh loh avangin sikul an kal tawh rih lo a, engagement order an ngaichâng mek.

MR teacher-te hi DPAR leh Finance department pawmpuinaa Departmental Promotion Committee kaltlanga lak an ni a, mi 861 niin, ni khatah Rs 520 an hlawh a ni.