Book of the Year 2023 lawmman hlan a ni

Kum 2023 chhunga Mizo ṭawnga chhuak lehkhabu ṭha bera Mizo Academy of Letters (MAL)-in an thlan, 'Pangparhnima' tih ziaktu Ahmangaihi Khiangte hnenah MAL chuan nimin khan Book of the Year 2023 lawmman an hlan.

Book of the Year 2023 hlanna inkhawm, Chanmari YMA Hall-a buatsaihah hian MAL kum 60-na lawm nghal a ni a, MAL president Prof. RL Thanmawia'n a kaihruai. Khuallian JH Zoremthanga, MBSE chairman-in Book of the Year lawmman a hlàn a, lawmman hian thuchei leh Rs 10,000 a keng a ni.

MAL general secretary Dr Zoramdinthara sawi danin, MAL chhinchhiah dan chuan kum 2023 chhung khan Mizo ir-áwm chhuak lehkhabu 170 a chhuak a, chu'ng zingah chuan Ahmangaihi Khiangte ziah 'Pangparhnima' tih chu lehkhabu ṭha berah thlan a ni.

Pangparhnima tih lehkhabu hi thawnthu (fiction) niin, phek 500 a ni a, a thawnthu phuah dan leh a changtute a duan dan a danglam avang leh a ṭhat avangin Boof of the Year atan thlan a nih thu MAL hruaitute chuan an sawi.

Mizo Academy of Letters hi kum 1964-ah din a ni a, kumin hi kum 60-na niin, kumin tàwp lam hian diamond jubilee lawm an tum. MAL hian kum 1989-a lehkhabu chhuakte aṭangin lehkhabu ṭha ber an thlang ṭan a, ṭum 35 an sem tawh a ni.

MAL dismond jubilee pual hian MAL leh MBSE chuan nimin khan seminar an buatsaih nghal. 'Tunlai Mizo thu leh hla thlirna' tih thupui Dr H Laldinmawia, MAL assistant general secretary-in a sawi a, MAL Commitee member Dr Laltleipuii'n 'Mizo ṭawng kalhmang: Linguistic lam aṭanga thlirna' tih thupui a sawi bawk.