Zokhawthar mipuiin ramri khâr an duh lo
Sorkar laipuiin Indo-Myanmar ramri khâr a tum chu Mizorama Myanmar khaw depa awm Zokhawthar khawtlang chuan an duh lo.
Zawhna chhangin Zokhawthar khawtlang hruaitute chuan, ramri khâr a nih chuan an eizawnna a chhiat vek theih thu an sawi a, "Myanmar nena insumdawn tawnnaah hian Zokhawthara chêng tam berte kan innghat. Sumdawnna piah lamah, bungraw lut leh chhuak thiar hna hi kan innghahna ber a ni," an ti.
Lo nei turin Zokhawtharin ram an neih loh avangin ramri khâr tumna chuan an eizawnna a nghawng hle dawn tih sawiin Zokhawthar khawtlang hruaitute chuan, "He hmalakna hi kan thláwp lo," an ti a; Bialtu MLA hnenah hmalakpui tura ngenna an thlen tawh thu an sawi.
Zokhawthar khawtlang hruaitute sawi danin, Zokhawthar leh Khawmawi, Myanmar-te chu khaw khat ang maia chêng, an mamawh leh châkkhai pawh inban tawn an ni a; chhiatní ṭhatnía inlênpawh tawn reng ṭhin an ni. Inkalpawh thei lo tura ramri khâr chuan an ni tin khawsak phung nasa takin a nghawng dawn.
Tun dinhmunah Indo-Myanmar border hi zirlaite leh hriselna lama mamawh neite tan hawn lailâwk a ni a; bungrua chu ni tin mamawh phur chauh kaltlangtir a ni.
Zokhawthar hi tun dinhmunah Myanmar aṭanga raltlan, Mizorama an awm tamna berte zinga mi a ni a, a buaipuitute chhinchhiah danin mi 7,000 vel an chêng. Raltlante ṭanpuina a luh mumal tawh loh avangin raltlante chu ni tina inhlawhfa leh dawrkaiin an eichawp an dap a; ramri khâr a nih chuan raltlante pawh nasa takin a nghawng dawn a ni.
Tarlan tawh angin, India (Mizoram) leh Myanmar ramri vengtu Assam Rifles-te chuan ni hnih chhung ramri an khâr hnuah April 20, Inrinni chawhnu khan an hawng leh a, mipuite an duh duha an inkalpawh erawh an remti lo.
Assam Rifles hotute hnen aṭanga thu dawn danin, Lok Sabha inthlanpui vote thlâk tur avangin sorkar laipuia thuneitute thupek angin Mizoram leh Myanmar ramria inkalpawhna pui ber, Ṭiau luia lei chu April 17, 2024 khan an khar a, darkar 48 chhung khâr tura tih a ni. Khâr a nih chhung hian mihring leh bungrua lutchhuak tur rêng rêng tihtawp a ni.
April 19, 2024-a inthlan vote thlâk zawh hnu, tlai dar 5 vel khan ṭiau lei gate tawntirhah mipui eng emaw zat an kal khawm a, gate chu hawng tawh turin an ngen. Mipui eng emaw zat pungkhawm mah se, harsatna lian tham a awm lo.
Thu dawn danin, Mizorama Assam Rifles hotu ber Brig. Girish Upadhya, deputy inspector general, 23 Sector leh Aizawla Assam Rifles battalion hotu lu Col. Mukesh Suhata leh Serchhip Battalion hotute chuan April 20, Inrinni khan Zokhawthar an tlawh.
AR hotute leh Zokhawthar khawtlang hruaitute chu Inrinni khan an inkâwm a; Ṭiau lei gate chu April 30, 2024 thleng hawn leh phawt turin an ti a, May 1, 2024 aṭangin khâr leh tum a ni. An thutlukna angin April 20, Inrinni chawhnu dar 1 aṭang khan an hawng leh ṭan.
Ṭiau lei leh ramrite April 30, 2024 thleng hawn a nih chhung hian mipuite duh duha inkalpawh a rem dawn chuang lo a, ṭul bik thil - damdawi leh ni tin mamawh la tura kal mamawhte chauh tana hawn a ni.
Assam Rifles thuneitute chuan, ramri khâr chu anmahni thua ti an ni lo a, thupek an hmuh anga khâr an nih thu an sawi.