Hindi hmasawnna tur CM sawipui

Mizo Hindi Zirlai Pawl (MHZP) hruaitute chuan April 22, Thawhṭanni khan chief minister Lalduhoma a pisaah an kâwm a, Hindi zirna hmasawnna turte an sawipui.

MHZP chuan, Hindi zirtirtu post ruak hnawhkhah loha kum tam tak a awm tawh thu leh hnawhkhah thuai a ṭul thu te, Samagra Shiksha hnuaiah Hindi tan bik assistant state project director dah ve a ṭul thu te, primary school-ah ṭawng chi thum - English, Hindi, leh Mizo zirna kalpui a ṭul te, CSS hnuaia Hindi zirtirtu aikal late chungah huai taka an hna aṭanga bàn thleng pawha hmalak a ngaih thute leh, Hindi zirnain ngaihsak a hlawh loh avanga harsatnate an thlen a ni.

Chief Minister chuan, sorkarin three language formula a ngai pawimawh dawn nia sawiin, "English, Hindi leh Mizo ṭawng ngaih pawimawh a ni dawn. Zirna siamṭhat kan ngai pawimawh dawn a, public private partnership kalpui tum a ni. Private school leh kohhran sikulte nen thawk hoin sorkarin a ṭanpui dawn," a ti a; zirna fee pawh tihhniamtir an nih dawn thu a sawi bawk.