Social audit chungchang inzirtir

Social Audit Unit - MISSAAT, Mizoram chuan nimin khan Durtlang Leitana SIRDPR conference hall-ah 'Refresher Course Training on MGNREGA & XV Finance Commission Social Audit for Block Resource Persons' an buatsaih a, Rural Development joint secretary Paul L Khuma'n a hawng.

Hawnna inkhawm hi Social Audit Unit - MISSAAT director C Laltleipuii'n a kaihruai a; Paul L Khuma chuan, "Eng hna pawh thawk ila, kan thawh tur dik tak kan chian a, taima taka kan thawh chuan hmasawnna leh rah chhuah tam tak kan nei ṭhin," a ti.

Paul L Khuma chuan, "Social audit kan neihin block resource person-te'n uluk taka kan kalpui a, thil dik lo kan hmuh chhuahte pawh siamṭhat a nih ngei a pawimawh," a ti a; block resource person-te chu mi dangte chaldelh si loa dik leh huaisen taka hna thawk turin a chah. C Laltleipuii'n social audit chungchang leh training neih tawh dan tlangpui a tarlang bawk.

Training-ah hian Aizawl, Lunglei, Lawngtlai leh Saitual district aṭangin block resource person mi 28 an tel a, vawiinah an chhunzawm ang. District dang zawng tan April 25-26, 2024 khian training neih leh tura ruahman a ni.