Loneih chungchangah thuthlung ziak

Champhai district Agricultural Technology Management Agency (ATMA) leh Tuipuiral Apple Growers Cooperative Society chuan nimin khan thawhhona thuthlung, memorandum of understanding (MoU) an ziak.

Thawhhona thuthlungah hian ATMA, Champhai district aiawhin project director Dr C Lalhriatpuia leh Tuipuiral Apple Growers Cooperative Society aiawhin chief executive officer Lalchhuanawmi Ralte ten hming an ziak a ni.

MoU-ah hian sum lama inpuihna tur a awm lo a, a tum ber chu agriculture lama thiamna inhlan chhâwn te, training leh demonstration kalpui te, thiamna hmanga thlai chìn te, uluk zawka tuihna enkawl inzirtir te, agriculture chemical-te renchem taka hman leh leilung tichhe loa a ṭha zawnga hman theihna atana changpât ek leiṭha tam tham siam chhuahte a ni.

Hmalaknate hian loneitute chu thingthlang loneih bànsan a, thiamna hmanga loneih (scientific agriculture) lam an thlan theih nan a puih theih beisei a ni.