KHAWTHLIR

Traffic-in ngen

Traffic Police chuan ngenna siamin, "Khua a ṭhál chho zel a, kângmei chhuah thulhah kangṭhelh motor chêt velna dîpa lirthei kan dah ṭhin hian pawi lian tak a thlen thei tih hriain, kawngpui dunga lirthei dah mai mai lo turin kan inngen e," an ti. Lirthei dahnaah hriat lâwk loh harsatna a thlen palha inbiakpawh zung zung a nih theih nan lirthei dashboard/windshield-ah phone number dah ṭhin turin mipui an ngen bawk.

Vawk lak luh khap

Mamit additional district magistrate Zoremthara Ralte chuan vawk hri African Swine Fever (ASF) laka Mamit district a him theih nan khapna thupek a tichhuak a; ram dang, state dang leh Mizorama ASF lênna hmun aṭanga vawk, vawksa rêp leh vawksa aṭanga siam eng pawh lak luh khap a nih thu a puang. Ran damlo leh hrisel lo zawrh leh hralh khap a nih thu te, vawk thite chu chinai nen thûk taka phûm tur a nih thu a tarlang a; vawk thi neitute chu AH&Vety department-ah inhriattir turin a chah bawk.

Meizial man

Dapchhuah check post-a duty Mamit police-te chuan nimin zing khan truck pakhat aṭangin ram dang meizial (foreign cigarette) tam tham tak an man. Police-te hian nimin vek khan meizial an mante chu dan anga hmalak chhunzawm turin Aizawl Custom office-ah an thawn a ni.

Zirtirtute zirtir

School Education department hnuaia PM POSHAN, Mizoram huaihawtin nimin khan Lawngtlai Chandmary Inpuiah Lawngtlai RD Block leh Bungtlang South RD Block chhunga sikul zirtirtu 150 tan naupang chawchhùn sem kalpui dan zirho a ni. Mizorama zirnain hma a sawn theih nan leh zirlaite'n hmasawnna tluantling an neih theih nan ṭhahnemngai taka thawk zel turin zirtirtute chu fuih an ni.

LMC thukhawm

Lunglei Municipal Council (LMC) hnuaia Municipal Sanitation Committee chu nimin khan Lunglei Convention Centre-ah an ṭhukhawm a, hmalak dan tur hrang hrang an rêl. LMC-in sanitation fee a lak hnuah complaint chi hrang hrang - septic tank pût (leak), bawlhhlawh paihna hmun tur ni loa paihte vawi eng emaw zat endik a nih tawh thu tarlan a ni.