Box Office: 'Civil War'-in hma a hruai chhunzawm

North American box office-ah Alex Garland-a dystopian thriller 'Civil War' chuan a kar hnihna atan hma a hruai chhunzawm zel. A24 produce film hi a siamna atan USD mtd. 50 vel an seng a, a kar hnihnaah hian theatre 3,929-ah chhuah chhunzawmin, USD mtd 11.1 a lak luh belh leh.

Kar hnih chhungin 'Civil War' hian USD mtd 44.9 a la lut tawh. No. 1 dinhmun hauh chhunzawm mah se, ticket sales erawh a tlahniam hle. Kar liam ta chhung khan box office lam thawm a na lo a, an sum lak luh hi nikum tun ang huna an lak luh aiin 20% dawnin a tlahniam a, kum 2019 aiin 33% velin a hniam zawk bawk.

Universal Pictures kutchhuak, Dracula fanu chanchin, horror film 'Abigail' chu no. 2-ah rawn langin, theatre 3,384 aṭangin USD mtd 10.2 a la lut. Thla hmasa lama thawm nei lian tak,"Godzilla x Kong: The New Empire" chuan domestic-ah USD mtd 9.5 leh international-ah USD mtd 21.6 hmuh belh lehin no. 4-ah a la awm a, kar li chhunga a sum hmuh hi USD mtd 485.2 a tling tawh. Guy Richie film thar, '"The Ministry of Ungentlemanly Warfare' chu no. 5-ah rawn lang thei hram a, theater 2,845 aṭangin USD mtd 9 a la lut.