Hripui vei hmuh thar mi 38 zingah Mizoram chhunga kái 35 an awm
October 29, Ningania Mizorama Covid-19 vei hmuh chhuah mi 38 zinga mi 35 (92.11%) chu Mizoram chhunga kái chhawng an ni a; an zingah taksaa harsatna nei (symptom lang) mi 13 leh sikul aṭanga kái nia hriat mi pakua an awm.
Sorkar thuchhuah aṭanga a lan danin, hripui vei hmuh thar, Mizoram chhunga kái mi 35-te chu Aizawla veng 11 leh khaw dang palia mite an ni. An zinga mi pariat chu an kài ṭanna hriat a ni lo a; kài ṭanna hriata ngaih mi 27 zingah sikul aṭanga kái nia hriat mi pakua awmin, zirlai naupang panga, zirtirtu pahnih leh thawktu dang pahnih an ni.
Aizawla Ebenezer Medical Center-a damlo awm leh damlo awmpuitute bakah, he damdawi-in kaihhnawiha Covid-19 kái nia hriat mi pasarih an awm a; an zinga pahnih chu damlo enkawl lai, Covid-19 symptom neih vanga RAT hmanga endik, hripui vei tih finfiah tâkte an ni. Zaipawl hla zirna aṭanga kái nia hriat mi pakhat a awm bawk.