Hmeichhia pawngsual tuma puh Doctor a hna aṭangin bàn a ni

Dr JH Vanlalnunmawia s/o JH Vanlalnela, Ramhlun North, National Health Mission (NHM) hnuaia thawk chu October 26, 2020 zanah Sakawrdai nula pawngsual tumah leh thaha vaua puh a nih avangin a hna aṭangin bàn a ni.

Hemi chungchangah hian October 29, 2020 khan NHM mission director Dr Eric Zomawia'n order a tichhuak. Dr JH Vanlalnunmawia chu NHM hnuaia contract-a thawk turin February 18, 2020-ah lâk a nih thu te, contract agreement-ah sorkar hnathawkte Conduct Rules-in a phuar a, dan loa a che a nih chuan bàn nghal theih a ni tih a awm thute order chuan a tarlang.

Tarlan tawh angin, NHM hnuaia Sakawrdai damdawi-in (community health centre)-a medical officer Dr JH Vanlalnunmawia hian October 26, Thawhṭanni tlai/zana Darlawn aṭanga Sakawrdai lam pana car-a a phurh Sakawrdai nula chu kawng lakah pawngsual a tum bakah, thahah a vau nia sawi a ni. A lakah Sakawrdai Police Station-ah FIR thehluh a ni a, thubuai ziah luh a ni.