MPSC chhuituin report a thehlut
Mizoram Public Service Commission (MPSC)-in tun hnaia sorkara thawk tur lâkna a kalpui danah dik lo a awm nia sawite chhui chiang tura Mizoram sorkarin inquiry officer (IO) a ruat M Lalmanzuala chuan nimin khan sorkarah a chhuina report a thehlut.
MPSC-in sorkara thawk tur lâkna a kalpui dan chhui turin Mizoram sorkar chuan M Lalmanzuala, IAS (Rtd), MPSC chairman hlui ni bawk chu April 16, 2024 khan a ruat a, chawlhkar khat chhunga chhui zo tura tih a ni.
Thu dawn danin, inquiry officer M Lalmanzuala hi Secretariat-ah office pek a ni a, April 17 aṭang khan hna a thawk ṭan. Hun tiam chhungin a chhui zo hman a, nimin khan Vigilance Secretary hnenah report a thehlut a ni. Report hi Vigilance Secretary hian Chief Secretary hnenah a thehlut ve leh ang. Inquiry Officer-in a chhui chhung hian MPSC pisa chu khàr a ni a, police-in an véng a ni.
Vanglaini palai zawhna chhangin M Lalmanzuala chuan, hna a thawh chhungin harsatna a nei lo a, MPSC-a thawkte pawhin ṭha taka an ṭawiawm thu a sawi.
Tarlan tawh angin, MCS Combined Competitive Examination 2023 kalpui dan leh sorkar hnathawk tur lakna dang kalpui danah thil dik lo a awm nia ngaiin MZP chuan MPSC chairman JC Ramthanga báng turin an phût a, April 15 & 16, 2024 khan MPSC pisa kái turte an dang bawk a ni.