RM Chakma-ah thutlukna la siam lo; 'Dan thiamte nen kan enho ang' - Speaker

Assembly speaker Lalbiakzama chuan MLA aṭanga Tuichawng bialtu Rasik Mohan Chakma bàn a nih leh nih loh turah thutlukna a la siam loh thu a sawi a, "Dan lam thiamte nen kan la enho ang," a ti.

Lalbiakzama chuan, Mizoram Advocate General chu a buai rih tih sawiin, "Kolkata Mizoram House hralh sûtna Calcutta High Court-in a sûtna khin lêt a nih dawn avangin Advocate General a buai rih hle," a ti a; Advocate General hman hunah RM Chakma insawifiahna an la enho tur thu a sawi.

Assembly Speaker chuan, dan ang thlapin uluk taka thil tih an tum thu sawiin, "Complaint ka dawn avangin show cause notice pek kha ka tih ngei ngei tur a ni," a ti.

Tarlan tawh ṭhin angin, Assembly Speaker chuan RM Chakma chu MLA aṭanga bàn a nih loh chhan tur sawifiah turin March 23, 2024 khan a hriattir a ni.

Assembly Speaker hian Chakma Autonomous District Council (CADC) MDC Doymoy Daveng Chakma hnen aṭangin complaint a dawn thu RM Chakma a hriattir a, "CADC Chief Executive Member ni chunga MLA i ni reng hi dan bawh­chhiatna a nih thu a rawn thlen a, dan angin MLA aṭanga bàntir theih i ni," a ti.

RM Chakma hi The Mizoram State Legislature Members (Removal of Disqualification) (Amendment) Act, 2006 hmanga MLA aṭanga bàn theih a nia a lan avangin, bàn a nih loh chhan tur April 15, 2024 hmaa sawifiah tura tih a ni.

RM Chakma chuan dan bawhchhiatna a neih loh thu Vanglaini a lo hrilh tawh a; insawifiahna pawh hun tiam tàwp ní, April 15 khan Assembly Speaker hnenah a pe a ni.