Myanmar kuhva vangin Bilkhawthlirin cheng vbc. 10 vel hlohah an inngai

Bilkhawthlir Kuhva Ching Society (BKCS) chuan dan loa Myanmar aṭanga lut kuhva tawlhruk vangin kum 2023 chhung khan cheng vbc. 10 vel hlohah an inngai. Hetiang a nih avang hian March 3, 2024 aṭang khan Myanmar kuhva rah tawlhruk an châng ṭhin.

BKCS hruaitute sawi danin, Myanmar kuhva tawlhrukte Ministry of Home Affairs lamin India rama lak luh a khap hnuah Assam chuan Mizorama thar chhuah kuhvate pawh Myanmar kuhvaah ngaiin an state chhungah lak luh a khap. Hei vang hian nikum hmasa lam aṭang khan Mizorama kuhva chíngtute kuhva hralhnaah harsatna an nei tawh a ni.

Nikum hmasa lamah pawh khan Myanmar kuhva tawlhrûk chângin duty an indah tawh a, kuhva tawlh a ziaawm chhoa an hriat avangin an chawlhsan lailawk a ni. Hetih lai, hian kuhva tawlhruk a tam leh nia hriain March 3, 2024 aṭang khan chhun zan zawmin duty an indah leh a ni.

Myanmar kuhva tawlhruk vang hian kuhva thar hralhnaah harsatna an tâwk tih sawiin BKCS hruaitute chuan, "Assam sorkarin an state-a lak luh a remtih loh avangin kum danga rawn lei ṭhin vai ho an rawn lut ṭha ngam lo. Hei vang hian kuhva kan hralh chhun pawh kum dang angin kan hralh to thei lo," an ti.

BKCS hruaitute chuan, nikum khan kuhva hralhna aṭangin cheng vbc. 27 vel hmuh theih an inbeisei laiin, cheng vbc. 17 vel an hmuh thu sawiin, "Kum dangah chuan kuhvate hi a pàr laiin vai hoin min rawn leisak ṭhin," an ti a; kuminah chuan pár chho leh mek mah se, kuhva lei tuma an khuaa kal an la awm loh thu an sawi.

BKCS hruaitute sawi danin, March 3, 2024 aṭanga an duty hnuah Myanmar aṭanga kuhva tawlhrukna lirthei 17 an man tawh a, police hnenah an hlan ṭhin. A ṭhen erawh chu police-in dahṭhatna an neih tawh loh avangin an tiral bawk.

Vairengte leh a chhehvela kudam awmte chu dan loa din nia an hriat thu sawiin BHCS hruaitute chuan, "Dan loa din a nih chuan sorkar hian ṭhiat ngam se, kuhva tawlhruk a ziawm phah ngei ang," an ti a; Myanmar lam aṭanga dan loa kuhva tawlh a la awm renga an hriat thu an sawi bawk.