Sorkar hnathawk group A&B-te Hlawh lâk hun tur a la hriat loh

Mizoram sorkar hnathawk group A leh B-te hlawh tur siam turin department cashier-te hriattir an la ni lo a, hlawh an lâk theih hun tur hriat theih a la ni lo.

Tarlan tawh angin, Mizoram sorkar Treasury-te chuan October 26, 2020 khan sorkar department-a sum khawihtu, Drawing and Disbursing Officer (DDO)-te hriattirna a tichhuak a; sorkar sum harsatna avangin October 2020 hlawh atan sorkar hnathawk group A leh B-te hlawh tur bill thehluh tawh chu la lêt turin a hriattir a ni.

Chumi hnuah Treasury leh DDO-te chuan Finance department aṭanga thu thar dawn an la nei lo. Finance department chuan November 10, 2020 hmaa tihfel theih a thuphung chuan an inbeisei nia thu dawn a ni.

Hetih lai hian, sorkar department-te chuan an depart­ment-a group A leh B-te hlawh tura bill an siam, Treasury-a an thehluh tawhte chu an la lêt tawh hlawm. Group C leh D-te hlawh tur chauh an siamṭha leh a; mahse, Aizawlah inkhàrkhip a nih avangin group C leh D hlawh lâkna tur bill chu Trea­sury-ah an la thehlut hman lo.

Finance department chuan, October 27 khan office order tichhuakin, Aizawl South leh North Treasury-a thawktute chu November ni 2 leh ni 3-ah office kal turin a hriattir.

Thu dawn danin, sorkar hnathawk hlawh tur chu Finance department lamin rem an tih chuan bill an dawn aṭanga hun rei lo te chhungin Treasury-in an pe chhuak nghal mai ṭhin a ni.