Mizoram Education Service din theih nan MZP-in hma la dawn

Mizo Zirlai Pawl (MZP) hruaitute nimina an pisa conference hall-a ṭhukhawm chuan, Mizoram Education department enkawltu tur Mizoram Education Service (MES) din a nih theih nan hmalak an rêl.

MZP ṭhutkhawm hi an president H Lalthianghlima'n a kaihruai a; Sairang thlengin rêl a lo luh thuai dawn avangin sorkarin inner line permit (ILP) a endik dan turah ruahmanna felfai zawk a siam theihna atana hmalak te, sumdawnna leh inchîmralna laka Mizote him theih nan zirchianna leh inzirtirna neih leh, Mizo schedule tribe list ennawn a nih theihna tgura hmalakte an rêl a ni.

Zirlaite ruihhlo laka an fihlim theih nana hmalak te, ram pum huapin career awareness neih te, Mizorama zirnain hma a sawn theih nan tuna syllabus hman mek chu zirchiana a ṭul anga hmalakte an rêl bawk.

MZP chuan, Champhai district-a zirlai pakhat vawi tam tak pawngsual a ni chu lungchhiatthlak an tih thu tarlangin, pawi khawihtua puh Saitawna leh a fapa Vanlalmawia te chu an phû tâwka hrem ngei an duh thu an tarlang a, "Hetiang thil duhawm lo tak hun rei tak chhung hriat chhuah loh hai chhuaktu an zirtirtu hi kan chhuang tak zet," an ti.