LMC Road Protection Squad Lungleiah din thar leh an rêl

Lunglei Municipal Council (LMC) hnuaia Traffic and Transport Coordination Committee chu nimin khan an chairman K Lalrinawma, LMC vice chairman hoin an ṭhukhawm. Hmalakna tur an sawiho zingah District/LMC Road Protection Squad din thar leh a tel.

Ṭhutkhawmah hian, Lunglei khawpuia lirthei lian (HMV) luh hun te, pick-up leh two wheeler taxi stand turte sawiho a ni. Lunglei khawpuia traffic titâwttu hrang hrang zir chian a, siamrem dan leh LMC huam chhunga one way siam theih dan zirchiangtu tur study team din bakah, District/LMC Road Protection Squad din thar leh an rél a ni.

Rûi chunga two wheeler khalh ṭhinte chungchangah chak zawka hmalak dan tur sawiho a ni a; garage nei lote August 2024 aia tlai loah garage nei vek tura LMC-in thuchhuah a lo siam tawh chu bawhzui dan tur sawiho a ni bawk.