Vawk hri ASF do dan tur sawiho
Animal Husbandry and Veterinary (AH&Vety) department officer-te chuan an minister C Lalsawivunga hoin a pisaah vawk pûl hri, African Swine Fever (ASF) chungchanga Mizoram dinhmun leh hri do dan turte an sawiho.
ASF vei vawkte chu enkawlna damdawi a awm loh avangin hri kai lo tura fimkhur leh inven a ṭha ber tih an sawi a, "Ran in intlawhpawh loh, ran damlo leh sate zawrh chhuah loh, ran thite thûk taka phûm, ran in leh a velte damdawi nena tih thianghlim fo tur a ni," an ti a; ASF laka invenna leh ASF vei vawk enkawl dan turte chu mipui hnena a thara inzirtirna ṭha neih leh ni se, tiin an rél.
Minister C Lalsawivunga chuan, Mizoram saa intodelh turin AH&Vety department-in nasa takin hma a la mek tih sawiin, chutih laia ASF a léng leh ṭhin chu pawi a tih thu a sawi a; department-a thawktu officer-te theihtawp chhuah zel tura a chah rualin, ASF do beihpui thlaknaah AH&Vety department hmalaknate ṭawiawm a, sorkar dan leh thupekte zâwm hram hram turin mipui a chah.
AH&Vety department officer-te sawi danin, ASF hi kum 2021 khan Mizoramah chuan Lungsen khuaah hmuh ṭan a ni a; ASF vanga vawk thi leh suat chu hri len ṭan tirh lam aiin a tlem chho tial tial a ni.
Kum 2021-a ASF a lèn hnuah a reh tak tak thei tawh rih lo a; kum 2022, 2023 leh 2024-ahte pawh ASF léng leh vawk thi report a la awm chho zel. Tun hnaia ASF léng thar anga lang chu May 2023 thla aṭanga léng a ni a, May 2023 hnuah thla tin vawk thi report a awm a ni.