Kolasib-ah World TB Day an hmang

Nimin khan Kolasib IPR conference hall-ah World Tuberculosis Day hman a ni a, district bawrhsap John LT Sanga khuallian a ni. Kolasib district-a village council 14 chu TB awm lohna khua - TB Free Village atan an puang.

Kolasib district-ah VC 56 a awm a, chu'ng zinga VC 14 - Zanlawn, Serkhan, North Chaltlang-I, North Chaltlang- II, Bûkpui, Thingthelh, Buhchangphai, Saihapui-K, Pangbalkawn, Meidum, Phaisen, Saihapui-V, North Chawnpui leh Saipûmte chu TB Free Village atan puan a ni a, VC hruaitute hnenah lawmman hlan a ni.

John LT Sanga chuan, khawtlang tihhmasawnna atan hriselna a pawimawh a, boruak, tui leh ei tur thianghlim nei tura ruahmanna siam te, bawlhhlawh sâwngbàwl dan ṭha inzirtirte chu hmasawnna kailàwn pawimawh a nih thu a sawi a, "VC hruaitute hi khawtlangin anmahniah hmasawnna kawnga kaihruaitu ni tura rinna thui tak an neih avanga thlan tlin an ni. TB natna ûm bona leh khawtlang hrisel siamna bakah, TB free district-a puan kan nih thuai theih nan thawhhona ṭha kan neih zel a ṭul," a ti.