KHAWTHLIR
Thisen pe
YMA, Khawzawl Vengthar Branch chuan an din champha lawm nan nimin khan blood donation camp an huaihawt a, Champhai District Hospital tan thisen unit 74 an pe a, petute mipa 60 leh hmeichhia 14 an ni. Aizawl North College NSS unit pawhin nimin khan an college-ah Civil Hospital, Aizawl tan thisen unit 40 an pe a, petute mipa 23 leh hmeichhia 17 an ni.
Chief Minister hmu
Save the Riparian hruaitute chuan nimin khan chief minister Lalduhoma chu a pisaah an kâwm a, Tlawng lui fintu luite an tihfai dan report an thehlut. Chief Minister chuan, lui dung then fai hna an thawhnaah hnatlan ve ngei a tum thu leh chak zawka dan lekkawh a nih theih nan theihtawp chhuah a tum thu a lo hrilh a, an kal zelnaa hman turin pawisa a lo pe tih Save the Riparian chuan an tarlang.
CBC in thar hawng
UPC North East India hnuaia Pathian thu zirna, Calvary Bible College (CBC) in thar chu nimin khan Mualpuiah UPC-NEI general superintendent Rev. R Lalrinsanga'n a hawng a, Assembly speaker Lalbiakzama leh bialtu MLA Lalchhuanthanga bakah, UPC-NEI hruaitute leh khawtlang hruaitute an tel. UPC-NEI General Conference 2021 chuan CBC hi Shillong aṭangin Aizawla sawn a rêl a, November 28, 2022 khan Mualpuiah in thar sakna tur lungphùm phùm a ni.
Mi 92 man
Serchhip District Anti Tobacco Squad chuan sorkar kum 2023-24 chhung khan Serchhipah anti-tobacco squad drive vawi 29 an nei a, puipunna hmuna mei zùa dan bawhchhia mi 92 manin, pawisa an chawitir tling khawm chu Rs 5,580 a ni.
Pension zirho
Mamit district-a pension buaipuitute tan nimin khan Directorate of Local Fund Audit & Pension chuan sorkar hnathawk pension leh a kaihhnawih thilte chinfel dan inzirtirna an buatsaih. Pension deputy director F Lalremmawia'n a hmanpui a, AA/AO (pension) R Lalṭanpuii, Lalkroschhuanga leh Albert Lalthansanga ten thil pawimawhte an zirtir a ni.