KHAWTHLIR

November 7, Inrinni khan KṬP, Mission Veng Branch chuan an kohhran sunday school hall-ah thisen pêk rûnpui an huaihawt a, mipa 70 leh hmeichhia 19-te'n Civil Hospital, Aizawl (CHA) tan thisen unit 89 an pe. KṬP, Zotlang Branch pawhin an kohhran hall-ah Synod Hospital tan unit 40 an pe a, petute mipa 34 leh hmeichhia pali an ni. ṬKP Coordination, Aizawl chuan CHA Blood Bank-ah unit 45 an pe a, petute mipa 34 leh hmeichhia 11 an ni. LIKBK Ṭhalai Pawl, Lawngtlai AOC Bial pawhin District Hospital-ah thisen unit 23 an pe bawk.

State Referral Hospital-ah nimin khan Covid-19 vei mi pakhat dah luh niin, ani nen hripui vei mi 60 an awm mek a, an zinga paruk chu ICU-ah enkawl an ni. Mi 60 zingah kum 60 chung lam mi 24 leh kum 14 hnuai lam mi pahnih an awm. SRH-ZMC Bulletin tarlan danin, ICU-a enkawl paruk zinga pathum chu ventilator nen enkawl an ni a, pathum dang pawh oxygen pek mek an ni.

January 9, 2015 zana Sangliansiama, Republic Vengte chhungkuaa mi panga thattu Laltlanchhuaha hrem a nih dan tur thu vawiin chawhma dar 11 hian Aizawl additional district & sessions judge Dr HTC Lalrinchhana'n a puang dawn. 

Mizoram BAR Association (MBA) chuan Lailapur, Assam-ah kawngpui dan a nih avanga harsatna awm chungchang November 7, Inrinni khan Ministry of Home Affairs-ah ziakin an thlen a; "Harsatna hi chinfel a nih loh chuan dan angin hma kan la chhunzawm ang," an ti. MHA hian hma a lak loh chuan Gauhati High Court, Aizawl Bench-ah MBA hian PIL thehluh an tum a ni.

Khatla South Branch YMA chuan, an veng thlànmual chu nawmsip bàwlna leh thil sual tihna atan hman an remti lo tih tarlangin, thil ṭha lo tih tumte chu kal tum lui lo turin an chah. Khatla South thlànmuala thlàn eng emaw zat chu October 28, 2020 khan tihchhiat a ni a, hei vang hian Khatla South YMA chuan thlànmualah chhun leh zanah duty an indah ṭhin.