Mipuite thlamuan turin police kan dah Ramria police-te hnuhkîr a rem rih lo - Chief Secretary

October 29, Ningani zan dar 6:30 khan Union Home secretary Ajay Kumar Bhalla hoin Mizoram chief secretary Lalnunmawia Chuaungo leh Assam chief secretary Kumar Sanjay Krishna ten video conferencing hmangin Mizoram-Assam ramri leh chumi vanga buaina inmun mek chungchang an sawiho. Lalnunmawia Chuaungo chuan, ramria Mizoram IR sipaite hnuhkîr a la rem loh thu a sawi.

Meeting-ah hian Mizoram leh Assam inkalpawhna kawngpui dan leh ramri vela buaina sosang mek tihtawp chungchang sawiho a ni a; Union Home Secretary chuan, state pahnihin ramri bula police an dahte chu hnukkîr ve ve ni se, tiin a rawt a ni.

Sorkar thuchhuah tarlan danin, Home Secretary rawtna chungchangah hian Lalnunmawia Chuaungo chuan, "Assam lam aṭangin ramri hrûl Mizorama chêng mipuite nasa taka tithlabár zawnga hmalak a nih ṭhin avangin kan mipuite thlamuan turin police tlemtê dah mai kan ni. Tun dinhmunah chuan Mizoram police-te hi ramri buaina aṭanga hnuhdawh a rem lo," a ti.

Mizoram Chief Secretary chuan, ramri buaina hmunah Assam lam aṭanga senior officer kalte'n Mizoram aṭanga duty official leh police junior zawkte an vau ṭhin chu a dik loh thu a sawi a, 'ti tawh lo se' tiin rawtna a siam.

MHA Joint Secretary hoa meeting-a thutluknate an zawm nghal laiin, Mizoramin an bawhzui ve lo anga Assam lamin an puh chungchangah Lalnunmawia chuan, October 17, 2020-a buaina thlen hnua Lailapur bula Mizoram police section hnih dahte chu Vairengte lamah hnuhkîr a nih tawh thuin a chháng.

Assam Chief Secretary chuan, Mizoram mamawh phurtu lirthei dante an tlân leh vat theih nan hma la turin Silchar DC a hriattir thu a sawi a, "Naktuk (vawiin) ah chuan traffic hi mumal takin, a pangngaia che hman tura beisei a ni," a ti.

Sawihonaah hian, DC-te hriatpuina tel loin officer-te'n ramri buaina hmun tlawh tawh lo se, an ti a; ramri hrúla DC-te chu zing zawkin inkâwm ṭhin se, an ti bawk.