MZP hruaitute'n Saihapui-V an tlawh

MZP hruaitute chuan an president B Vanlaltána hoin nimin khan ramri bul hnaia khua Saihapui-V an tlawh a; Hmar Students' Association (HSA) Sin­lung Joint Hqrs hruaitute'n an ṭawiawm.

MZP President chuan, Assam-in Mizoram an nêkna leh vauna karah Mizoram sorkar leh police-te hmalakna lawmawm an tih thu a sawi a, "Assam hoin an duh hun hunah kawngpui dang a, an duh hun huna an rawn tlangtir a, an tel loa awm thei loa min ngai hi a tlàwmthlak. Kawng an tlangtír lo a nih chuan Mizo mipui zahawmna humhim nan sorkar hotute'n Assam sorkar engti kawng pawha be lo turin kan duh," a ti a; Mizoram chu vau zâm mai theih a nih lohzia lantir a ngaih thu a sawi.

MZP adviser L Ram­dinliana Renthlei chuan, tuna buaina chu ramri thil a ni tih sawiin, "Sorkar hian issue hi a man lo ang tih a hlauhawm khawp mai. Ramri buaina phènah Assam hoin kawngpui an dang a, kan sipaite an vau mai zawk a ni. Mizoram sorkar hian a ramri tichiang se la, chumi hmang chuan map siam rawh se," a ti.