Hripui donaa hlawhchhamah sorkar puh

Mizoram Pradesh Congress Committee (MPCC) chuan, Covid-19 chu a lên tirh aṭanga politics khelhna hmanruaa hmangah leh hripui lêng donaa hlawhchhamah MNF party leh an kaihhruai Mizoram sorkar an puh.

Congress party chuan, sorkarin Covid-19 a do danah politics-a hlâwkna tèl tuma thusawi leh hmalakna tam tak a awm nia sawiin, chumi vanga mipui tawrhna thlengte chu pawi an tih thu an sawi a, "MNF sorkar hi Covid-19 donaah fimkhur taka hma la ṭhin tawh turin kan ngen a ni," an ti.

Mizoram sorkarin Covid-19 chungchangah hmingṭhat a duh avangin hri vei enkawl mekte endik nan Rapid Antigen Test (RAT) a hmang lui tlat nia sawiin MPCC chuan, "A tam thei ang ber chhuahtir tumin hma a la a, Covid-19 enkawlnaa che ṭha bera lan a tum avangin mipui himna a ngai pawimawh lo," an ti. Covid-19 positive-te endik nan RT-PCR hmang duh lo a, result dik lo nasa tak RAT an hman tlat avangin positive tam tak, dam chiang loin an chhuah phah nia a lan thu leh, chu chu tun hnaia hripui vei an pun leh hluai chhan dik taka an ngaih thu an sawi.

MPCC chuan, a tìr aṭangin MNF sorkarin Covid-19 chu politics khelhna hmanruaah a hmang nia sawiin, RT-PCR dahna tur laboratory din chungchangah pawh thu dik tâwk lo mipui an hrilh a, fak a hlawh theihna tur záwngin hma a la niin an sawi a, "Politics khelhna atan an hman avangin ICU-a dah ngai khawp positive ni tin kan neih belh hial. ICU chungchangah Chief Minister a hlauthâwng a, mualpho hlauin sorkarin ICU a neih zat thu dik tâwk lo mipui bum nan an chhuah zui a ni," an ti.

Congress party chuan, MNF sorkar leh Health minister Dr R Lalthangliana chu politics khelhna hmanruaah Covid-19 hmang tawh lo tura an duh thu an sawi a; hmingṭhat ringawt tuma lemchang lo tur leh party hamṭhatna aia mipui hriselna tak tak ngaihtuah zawk turin an chah a ni.

→    Eptu party-te leh mithiamte rawtna Mizoram sorkarin ngai pawimawh loin VC leh LC inthlan an buatsaih luih avangin tualchhungah hripui inkài darhna nasa tak a thlen phah a, LC leh VC inthlan avangin Covid-19 vei mi 100 chuang an awm a, kai ṭanna hriat loh mi tam tak an awm phah.

→    Minister TJ Lalnuntluanga'n chhim lama a zinnaah June 1, 2020 khan, 'Covid-19 laka kan him theihna chhan hi Chief Minister-in Pathian a ṭih vang a niin ka hria’ tiin a sawi a; a sawi tûkah Mizoramah Covid-19 vei mi 12 hmuh chhuah a ni.

→    October 4-ah Health minister Dr R Lalthangliana'n thuchhuah a siamah, Covid-19 inkài chhàwnna chhut chah a nih tawh thu a puang; chumi hnu lawkah hripui vei hmuh chhuah nasa takin a pung. October 4-30 chhungin Covid-19 positive mi 574 hmuh chhuah a ni a, symptom nei tam tak an awm a, kàina hriat loh tam tak an awm.

→    Covid-19 dona atan mimal, kohhran, pawl leh MLA-te’n CM Relief Fund for Covid-19 ah sum ṭhahnem tak an thawh. Sum tlingkhawm chu a hmanna tur âwm taka hmang loin, sorkar sum aṭanga lei tura ngaih hmanrua - TrueNat kháwl, RAT test kit, lei nan sorkarin a hmang. Chutih laiin, state sorkar budget hmangin hmanhmawh thlaka ngaih loh hna cheng nuai tam tak man an party worker-te a thawhtir reng.