ZPM-in sorkar thláwp turin mipui ngen

ZPM party chuan thuchhuah siamin, Mizoram leh Assam ramri vanga buaina hrang hranga Mizo mipui ṭan rualna chu lawmawm an tih thu an tarlang a; Covid-19 donaa sorkar hmalaknate thláwp turin mipui an ngen.

Mizoram ramri vên kawngah ramri bul vel khaw mipui leh Mizoram police-te fakawm an tih thu sawiin ZPM chuan, "Vairengte, Saihapui-V leh Thinghlun khaw mipui leh kan sipaite ramri vênnaa in hnathawhte Mizo mipui hian kan hre reng a ni. Mipui ṭan rualna hian ramri chinfelna kawngah rah ṭha a chhuah ngei kan beisei," an ti.

ZPM chuan, ramri chungchanga political party leh pawl hrang hrangte'n an páwl hming dahṭhaa an ṭan rualna chu lawmawm an tih thu an sawi rualin, "Kan ramri chinfel loha tun thlenga la awm hi pawi kan ti a, ramri chinfel hi a ṭul tawh tak zet a ni," an ti a; ramri chinfel a nih theihna tura sorkar hmalaknate thláwp turin Mizoram mipui an sáwm.

Mizoram châk lâkna kawng pawimawh ber dan chah a ni ṭhin chu pawi an tih thu sawiin ZPM chuan, "Assam sorkar kan dem. Châk lâkna tur kawng dang, rintlak tak ngaihtuah turin ZPM party chuan kan state sorkar kan ngen nghal a ni," an ti. Ramria buaina leh hri léng vanga ei leh barah Mizoramin harsatna a tawh lohna tura hma latute chungah an lawm thu sawiin, dawrkaite chu bungrua chheprelh lo tur leh a man tisang lo turin an ngen.

ZPM thuchhuah chuan, tunlaiin Mizoramah hripui lêng a hluar leh tih sawiin, "Mipui himna atan sorkarin ṭha ber tur nia a hriatin min kalpui mek a, sorkar hmalaknate hi mipuite'n thlâwp tur leh hri laka kan him tlân theih nana fimkhur lehzual turin mipui kan ngen a ni," a ti a; hripui donaa a hmatáwnga thawk zawng zawngte leh ṭhahnemngai taka ṭawngṭai ṭhinte chungah lawmthu an sawi tih a tarlang.

Mizorama Covid-19 vanga thi hmasa ber Lalsangkhuma (66) h/o Lalthlamuani, Dawrpui chu an ui thu leh a chhungte an tawrhpui thu an tarlang bawk.