India leh Myanmar inkalpawhna May 1, 2024-ah khâr a ni dawn; Mizoram sorkarin a duh loh thu thlen a tum

Ministry of Home Affairs (MHA) thu angin India leh Myan­mar ramria inkal­pawh­nate chu May 1, 2024 aṭangin khâr a ni dawn. Mizoram sorkar chuan ram pahnih inkal­pawhna khâr a duh loh thu sorkar laipui­ah ziakin a thlen dawn.

Assam Rifles hotute chuan tun hnai khan Darthlalang Tlang, Champhaia an camp-ah Tlangsam, Zote, Ngúr, Ruantlang leh Hmunhmelṭha khawtlang hruaitute bakah, YMA Sub-Headquarters, Champhai leh Champhai South leh North Joint Village Council hruaitute an kâwm a; May 1, 2024 aṭangin India leh Myanmar inkalpawhnate khâr a nih tawh dawn thu an hrilh.

Assam Rifles hotute sawi danin, MHA aṭang thu an hmuh angin Lok Sabha inthlan vuakvêta ramri khâr a nih hnuah hawn leh a ni. April 2024 chhung chu ngaihhnathiamna kalpui a ni dawn a, Myanmar mi India rama awmte leh India mi Myanmar-a awmte chu April 30, 2024 thleng an chám thei ang.

Eng emaw avanga hun bituk chhung aia rei chám turte chuan duty-te phalna lak hmasak tur a ni a, phalna la lo chám luite chungah action lak a ni dawn. Champhai district-a border haat awmte pawh May 1 aṭang chuan khâr vek a ni dawn. Harsatna lian bikah erawh chuan chhin­chhiahna fel tak nen inkal­pawh theih a ni ang.

Ramri khâr a nih chhan tur pakhat chu, Champhai district chhung aṭanga ruihhlo tawlh nasa lutuk leh Myanmar mi leh sain Mizoram kaltlanga ruihhlo an tawlh nasa lutuk danchahna atan a ni.

Vanglaini palai zawhna chhangin Home secretary H Lalengmawia chuan, kumin May 1 aṭanga India leh Myanmar ramri khâr tum a nih chungchangah Mizoram sorkarin sorkar laipui aṭangin thu dawn a neih loh thu a sawi.

H Lalengmawia chuan, Mizoram sorkar dinna chu ramri khâr loh a la nih reng thu sawiin, "Sorkar laipuiah ramri khâr kan duh loh thu ziakin kan thlen dawn. Ramri khâr an tum chungchang hriattir kan ni lo pawh ṭha kan tih loh thu kan thlen ang," a ti.

Tarlan tawh angin, February 28, 2024-a Mizoram Legislative Assembly budget session-ah Home minister K Sapdanga official resolution 'Sorkar laipuiin free movement regime (FMR) tihtawp a tum leh ramri hung a tum duh lohna' lungrual taka pawm a lo ni tawh a ni.