AMC ward pahnihah by-election a ngai

Aizawl Municipal Corporation (AMC) ward pahnih - Ward VI leh Ward IX-ah by-election neih a ngai dawn a, by-election neih hun tur erawh hriat theih a la ni rih lo.

AMC by-election neih a ngaih chhan chu - Ward IX corporator Baryl Vanneihsangi Tlau MLA-ah a tlin avang leh Ward VI corporator John Zosangliana Ralte a thih vang a ni.

Vanglaini palai zawhna chhangin AMC hotute chuan, "Ward IX a âwl thu hi Baryl Van­neih­sangi'n MLA ni tura rinawmna thu a tiam hnu lawkah kan nodal department UDPA-ah kan thlen nghal. UDPA hian GAD lamah thlenin, GAD hian State Election Commission (SEC)-ah an thlen ve leh. SEC hian electoral roll buaipui turin DC lam an hriattir tawhin kan hria," an ti.

AMC hotute chuan, March 21, 2024-a thi ta John Zosangliana Ralte bial, Ward VI a âwl thu pawh UDPA department-ah an thlen tawh thu sawiin, "By-election neih hun tur chu kan kut a ni lo. Corporator seat a ruah thu erawh kan thlen ve ve tawh," an ti a, SEC-in by election neih hun tur chu an ruat vat tura an ngaih thu an sawi.

AMC-ah hian ward 19 a awm a, MNF party-in ward 11-ah corporator neiin sorkarna an siam mek a; ZPM party-in corporator paruk leh Congress party-in corporator pahnih an nei bawk. Baryl Vanneihsangi hi ZPM ticket-a thlan tlin a ni a, John Zosangliana Ralte chu MNF ticket-a thlan tlin a ni.