Manipur aṭanga oil leh gas phur tur vailiam

Assam lamah Mizorama bung­raw phur lut tur lirtheite dan a nih avangin Manipur aṭangin ei­rawngbawlna gas leh tuialhthei phurh luh dan sorkarin a ruahman anga phurtu tur lirtheite chu nimin khan Ch. Saprawnga Truck Terminal, Rangvamual aṭangin Food, Civil Sup­plies & Consumer Affairs (FCSCA) minister K Lalrinliana'n a vailiam.

K Lalrinliana chuan, Assam paltlang loin oil leh gas bakah, mamawh dang pawh phurh theih a ni tih lantir chakin theihtawp an chhuah thu a sawi a, "Oil leh gas phur tura IOC lamin ruahmanna min siamsak hnuah Chief Secretary-in Manipur Chief Secretary a bia a, Home lam pawh an inbe pawp a ni. Chuvangin, security thilah harsatna a awm lo turah kan ngai," a ti.

Assam kaltlang loin oil leh gas Mizoramin a la lut thei a ni tih lantir tura bul ṭan nan a thawh khatna atan Manipur aṭangin gas leh oil phurh a ni dawn tih sawiin Minister chuan, "A tìrah chuan gas truck trip sarih leh oil truck trip panga phurh phawt tum a ni a, Assam lamah a tlân leh theih tawh avangin ṭhenkhat an kal hman a ni," a ti a, driver-te chu koh lêt leh an nih thu a sawi.

Supply Minister chuan, Assam-in an state kaltlang loin Mizoramin mamawh a la lut thei a ni tih hria se an duh thu sawiin, "Manipur aṭanga gas leh oil phur tur hi intirh belh zel kan tum. Manipur aṭanga oil leh gas phurh luh turte hi Assam aṭanga phurh luh nen a man a inang reng dawn," a ti.

Manipur aṭanga gas leh oil phur turte vailiamnaah hian minister of state Lalchhan­dama Ralte leh MLA pahnih Lalrinsanga Ralte leh C Lalmuanpuia te pawh an tel a ni.