World Malaria Day: Lawngtlai dist-ah sikserh vei an tam fál

Nimin April 25 kha sikserh dona ní, World Malaria Day a ni a, Mizoram hmun hrang hrangah hman a ni. Kum 2023 (calendar year) chhungin Mizoramah sikserh vei mi 18,005 hmuh chhuah niin, mi 13-in an thihpui a, Lawngtlai district-ah sikserh vei leh thihpui an tam fál.

Health department tarlan danin, Mizoramah sikserh a la hluar hle a, India ramah mi 1,000 zel aṭanga sikserh vei hmuh chhuah zat aṭanga chhûtin India ramah sikserh tamna ber state a ni mek.

January - February 2024 chhungin Mizoramah sikserh vei mi 1,776 hmuh chhuah a ni tawh a, thihpui erawh an la awm lo. Kum 2023 (calendar year) chhung khan Mizoramah sikserh vei mi 18,005 hmuh chhuah niin, mi 13 an thi a; kum 2022 nena khaikhinin, kum 2023-ah hian sikserh vei hmuh zat 76.02%-in a pung.

Kum 2023 chhunga sikserh vei hmuh 18,005 zinga 44.07% chu Lawngtlai district-a hmuh a ni a; district pathum - Lawngtlai, Lunglei leh Mamit district-ah mi 16,174 hmuh niin, hmuh zawng zawng aṭangin 89.83% a tling.

Nikum chhunga sikserh vanga thi mi 13 zinga a zatve dáwn, mi paruk chu Lawngtlai district-a mi an ni a; Aizawl East, Siaha leh Kolasib district-ahte sikserh vanga thi an awm lo.

World Malaria Day hi Aizawlah chuan State Vector Borne Disease Control Programme huaihawtin Hospital and Medical Education auditorium-ah hman a ni a, Health & Family Welfare secretary Esther Lalruatkimi'n a hmanpui. Kumina Day thupui chu 'Accelerating the fight against malaria for a more equitable world' tih a ni.

(Sikserh dona ni hmanna inkhawm hi Health additional director Dr Hmingthanmawii'n a kaihruai a, National Health Mission (NHM) mission director Dr Eric Zomawia'n sikserh chungchanga Mizoram dinhmun tlangpui a sawifiah.

World Malaria Day pual hian April thla chhungin sikserh dona atana hmalakna hrang hrang kalpui a ni a; khawtlang mipui leh pawl hrang hrangte nen inzirtirna hun hman te, banner/poster tàr te, thosi pian theihna tui tling tihbo hnatlangte huaihawt a ni.

World Malaria Day hi World Health Organisation (WHO)-in hriselna lam kaihhnawiha 'day' a puan tlemte zinga mi a ni a; World Health Assembly, 2007 khan April 25-ah World Malaria Day hman rèl niin, kum 2008-ah hman ṭan a ni.