Savawm thâwm/awmna hriate EFCC-ah hriattir turin an ngen
Aizawl Zoological Park director Margaret Lalramchhani, deputy conservator of forest chuan, Aizawl Sahuan aṭanga March 1, 2024 zinga savawm chhuak ta thâwm leh awmna hriate chu Environment, Forest and Climate Change (EFCC) department hnena hriattir turin a ngen.
Margaret Lalramchhani chuan, savawm chu danin a humhalh thu tarlangin, "Savawmte hi Wildlife (Protection) Act, 1972 hnuaia Schedule-I ah dah an nih angin kâp emaw, a sa chan emaw kan awm a nih chuan an chungah dan anga hmalak a ni ang. Kum 3-7 chhung tàn theihna a ni," a ti.
Zoological Park Director tarlan danin, Sahuan aṭanga savawm chhuak chu April 20, 2024 zan dar 11 vel khan Lungverh péng chhaka tuikhawthla bulah kawngpui kân a tum lai leh kawng chhak lam a pan chho lai lirthei aṭangin hmuh a ni a; April 21 zing dar 2:30-ah Sairang tawntirha rél chawlhhmun tur siam mek chhak lamah a thâwm hriat a ni.
April 21 hian Dampa Tiger Reserve leh Thorangtlang Wildlife Sanctuary-a ramsa zeizia hre bik leh sa hnu chhui thiam bikte chahin, savawm hnu an chhui zui a; savawm hmu lo mah se, a hnu thar ni ngeia hriat Lungverh péng chhaka tuikhawthla chhak lam ramah hmuh a ni.
April 22 tlai dar 5:30 velah thisen hmuh a ni a, a bul lawkah hnáng hlaina hmuh a ni bawk a, hei vang hian savawm chu kah a nih rinna lian tak a awm. Thisen hmuhna bul vela khân hrang hrangah EFCC thawktute'n April 22 zan khan tlaivarin an châng a, an chànna huam chhung an dap vek bawk.
Thisen hmuhte chu lain, Mizoram University Biotech Laboratory-a endik turin pek a ni a; maua thisen kai chu mihring kut aṭanga kai nia rinhlelh a nih avangin Forensic Science Laboratory-ah finger print thawn a ni bawk. Savawm chu kah a nih rinna lian tak a awm avangin Sairang Police Station-ah FIR thehluh a ni.