Excise-in kumin 2024 chhungin heroin kg. 26.494 an man tawh

Excise & Narcotics department (END) chuan nimin khan an commissionerate conference hall-ah quarterly meeting an nei a; kumin 2024-ah nimin thleng khan heroin (no.4) kg. 26.494 an man tih an tarlang.

END quarterly meeting hi commissioner Z Lalhmangaiha'n a kaihruai a, END secretary Lalramsanga Sailo-in a hmanpui a, END officer eng emaw zat an tel.

Lalramsanga Sailo chuan END-in zu leh ruihhlo man chungchang leh website enkawlnaah hma an sawn thu leh Lok Sabha inthlan laia Election Commission of India duh dan anga ṭha taka hma an lak avangin a lawm thu a sawi.

END Secretary chuan, END officer leh thawktute chu tun aia awmze nei zawka thawk zel tur leh online surveillance lamah hmasawn lehzual tum turin a fuih a, "END thawktute hian mi dang aiin ram kan hmangaih zual bik a ngai a, mipui pawhin min hriat dan hi a dik leh a ṭha zawng a nih zel theih nan ṭan lak a pawimawh," a ti.

END hotute tarlan danin, January 1 - April 25, 2024 chhungin END-in heroin kg. 26.494 an man tawh a; rakzu litre 21,963.575 leh sapzu ûm 8,532 an man tawh bakah, ruihhlo dang tam tham tak an man tawh bawk.