PMJVK hnuaia hmalakna thlirho

Nimin khan Secretariat Conference Hall-ah Ministry of Minority Affairs secretary Katikithala Srinivas hoin sorkar laipui ruahman Pradhan Mantri Jan Vikas Karyakram (PMJVK) hnuaia project kalpui tawh leh hna thawhte thlir lêt a ni.

Ṭhutkhawmah hian PMJVK hmanga Mizorama department hrang hrang hnuaia hmalakna leh hnathawhte thlir lêt a nih bakah, hmalak zel dan tur sawiho a ni a; department hrang hrang secretary-te bakah, district tina bawrhsapte leh sorkar official dangte an tel.

PMJVK hi sorkar laipuiin hmun thlan bikte tihhmasawnna tura a ruahman a ni a; hmun thlan bikteah hmasawnna ruhrel leh mipui vantlang ni tin mamawh ṭulte siam a ni. Mizoramah pawh hna eng emaw zat thawh a ni tawh a, hnathawh mek leh hmachhawp eng emaw zat a awm bawk.

PMJVK hmanga hnathawhah sorkar laipui leh state sorkar ṭang dunna hnuaiah sum ruahman a ni a, hmalak zuina leh enkawl hna chu state/union territory kutah a awm. PMJVK hnuaia rawtna leh hmachawpte chu state level committee, state/UT chief secretary-te kaihhruaina hnuaiah buaipui a ni.