Heart Disease Screening Camp buatsaih

National Health Mission hnuaia Rastrya Bal Swasthya Karyakram (RBSK) leh Ebenezer Medical Centre ṭang dun chuan nimin khan Ebenezer Medical Center-ah naupang, lung (heart) natna neite tan Congenital Heart Disease Screening Camp vawi 6-na an buatsaih a; tlai dar 3 thleng khan echo hmangin naupang 186 endik a ni.

Screening camp hawnna inkhawm hi Health Services director Dr Lalremmmawii'n kaihruaiin, NHM mission director Dr Eric Zomawia'n a hawng a; cardiologist Dr Vanlalmal-sawmdawngliana hoin screening camp neih a ni. Camp-ah hian nau piang hlim aṭanga kum 18 inkar, lung lama harsatna nei hmun hrang hrang aṭangin an tel.

Camp-a tarlan danin, RBSK hian nimin thleng khan naupang 90 chuang lung zai ngaite senso tur a tumsak tawh. RBSK leh Ebenezer Medical Center hian January 25, 2024-a thawhhona thuthlung (MoU) an ziah angin screening camp-a naupang lung enkawl ngai thlan chhuahte chu Ebenezer Medical Center-ah an enkawl dawn a, inenkawlna sensote chu RBSK-in a tumsak dawn a ni.