Decentralised renewable energy hmanga nunphung tihhmasawnna tur sawiho

Social Welfare and Tribal Affairs department leh SELCO Foundation chuan nimin khan Aijal Club-ah Mizorama renewable energy hmanga nunphung tihhmasawnna atana thawhhona ṭha neih theih dan tur sawihona an buatsaih a, SWTA secretary Dr Lalhriatzuali Ralte-in a hmanpui.

SELCO Foundation hian January 2023 khan Mizoramah hma an la ṭan a, Mizorama eizawnna lama harsatnate sut-kian nan renewable energy (solar - nizung chakna hmang kawlphetha) hmangin loneih, ranvulh leh sumdawnna tênaute tihhmasawn tumin hma an la mek a ni.

Dr Lalhriatzuali Ralte chuan, sorkar department policy leh scheme awm tawhte leh renewable energy hmanga eizawnna tihchangtlunna lama hlutna belhchhah theih dan tur ngaihtuah a ṭul thu a sawi a; SWTA hnuaiah rualbanlote leh hmeichhe chanhai leh rahbi tlêute tan puanṭhui zirna a awm thu sawiin, an inzirna hmun tihchangtlun leh puanṭhui khawlte solar energy hmang tura thlak turin SELCO nena thawhho a beisei thu a sawi.

Thingtlang tihchangtlunna tur smart tribal village duan mek thu sawiin Dr Lalhriatzuali chuan, "Heng hmalakna hrang hrangah hian SELCO Foundation nena thawhhona ṭha tak kan neih theih ka beisei a, kan thawhho ṭhat chuan renewable energy hmangin Mizoramah grassroot solution tichakin, thui tak kan tihlawhtling thei ngei ang," a ti.

Dr Lalhriatzuali chuan, sorkar hand holding policy hnuaiah hmachhawp hrang hrang an neih thu te, SWTA hnuaia Tribal Research Institute, Kelsih peih ṭêp tawhah pawh solar energy mamawh a nih dawn thu te, Phunchawng leh Rangvamual bâwr vela sorkarin Mission Chhanchhuahna bul a ṭan tawh chu chhunzawm a, ruihhlo ngaite leh jail táng chhuakte tana thiamthil pek dan tur duan mek a nih thute a sawi bawk.

SELCO Foundation state lead Lal-nuntluanga Colney chuan, Mizorama eizawnna tihchangtlunna leh boruak inthlak danglamna tihziaawmna tura hman nawn theih thil hman a pawimawhzia a sawi.