Ni 2 chhungin vawk 76 thi, 14 suat a ni

Vawk pùl hri, African Swine Fever (ASF) vangin ni hnih chhungin Mizoramah vawk 76 a thi a, hri a darh zel loh nan vawk 14 suat a ni. Kuminah ASF vangin vawk 262 a thi tawh. Nimin khan district pahnihah vawk, vawksa leh vawksa aṭanga thil siamte lak luh khapna thupek chhuah a ni.

Animal Husbandry & Veterinary department chhinchhiah danin, April 24-25, 2024 chhungin Mizoram hmun hrang hrangah vawk 76 a thi a, vawk 14 suat a ni. Kumin 2024 chhungin ASF vangin vawk 262 a thi tawh a, vawk 95 suat a ni tawh bawk.

Nimin khan Serchhip leh Khawzawl district bawrhsapte chuan an district-ah vawk, vawksa leh vawksa aṭanga thil siamte lak luh khap a nih thu an puang a; thupek zâwm lote chu IPC Section 188 hmanga hrem theih an nih thu an tarlang.

Serchhip leh Khawzawl DC-te chuan, an district chhung khua leh khuaa vawk inlâkpawh turte chu vawk hrisel ṭha ngei a ni tih AH&Vety department hriatpuina la ngei turin an hriattir a, "Vawk hrisel chauh talh tur a ni a, vawk damlo talh tura sawngbawl phal a ni lo. Vawk damlo leh thite chu AH&Vety department-ah hriattir vat tur a ni," an ti a; vawk thi rêng rêng thûk taka phûm ṭhin tur a nih thu an tarlang.