KHAWTHLIR

Governor kâwm

Sorkar laipuia Minority Affairs secretary Katiki­thala Srinivas chuan nimin khan Governor Dr Hari Babu Kambhampati chu Raj Bhavan-ah a kawm. Larsap leh K Srinivas te hian Mizorama hnam tlem leh hnuaihnung zawkte dinhmun leh sorkar laipui scheme-te hmanga hma an sawn theih dan turte an sawi dun a ni. K Srinivas hi Mizoram District Council & Minority Affairs secretary Dr H Lalthangliana’n a ṭawiawm.

Dedication hmang

Presbyterian Bible School (PBS) chuan nimin khan zirlai batch 57-nate pualin Synod Conference Centre-ah Farewell and Dedication an hmang. Synod moderator Rev. R Vanlalnghaka'n hmanpuiin, zirlaite hnenah certificate a hlân a, PBS principal Rev. Lalrinsanga'n inkhawm a kaihruai. PBS-ah hian tun thlengin zirlai 2,723 an awm tawh a, chu'ng zinga 2,271 chuan ṭha takin an zo a; batch 57-naah zirlai 32 awmin, zirlai 25-in an zo a ni.

Hnathawh endik

Mizoram sorkarin hmasawnna hnathawhte endik tura a din, Mizoram State Project Monitoring Committee chuan nimin khan an vice chairman R Lal Rinawma hoin Maumual rama ‘Construction of Brick Wall Boundary Fencing (Block-1&2) at Protective Home’ hmalakna kal mek an endik. Project atan hian sorkar laipui aṭangin sum hmuh a ni a, phase-1 hnuaia hmalakna zawh a ni tawh a, phase-2 chhunzawm leh tura ruahman a ni.

CM's Relief Fund

Chin Baptist Church, USA hruaitute chuan nimin khan chief minister Lalduhoma hnenah Chief Minister's Relief Fund atan Rs 3,00,000 an chhûng lut. Chin Baptist Chucrh hruaitute chuan, Myanmar aṭanga Mizorama ratlante Mizoram sorkar leh mipuiin an dawnsawn danah an lawm thu Chief Minister an hrilh.

Malaria Day pual

Lunglei chief medical officer Dr LC Liana hoin nimin khan a pisaah Lungleia khawtlang hruaitu te, kohhran hruaitute leh zirna-in hotute'n World Malaria Day pualin advocacy meeting an nei a, sikserh donaa thawhho dan tur an sawiho.