Car loan vbc. 150 vel tihchingpen avangin police-te'n mi 11 an man; 'Aizawla car dealer-te pawh an inrawlh' - DGP
Mizoram Police chuan Mahindra Mahindra Financial Service Ltd. (MMFSL) kaltlanga car loan cheng vbc. 150 vel tihchingpen thubuaiah mi 11 an man. Sum tihchingpen chungchangah hian Aizawla car dealer panga an inhnamhnawih.
DGP Anil Shukla chuan nimin khan DGP conference hall-ah thuthar thehdarhtute kâwmin, MMFSL kaltlanga car loan cheng vbc. 150 vel tihchingpen chungchanga an hmalak dan a sawifiah a, "MMFSL-te'n Aizawl Police Station-ah March 20, 2024-ah FIR an thehlut a, mahse, sum kaihhnawih a tam avangin Mizoram Police hnuaia Economics Offensive Wing-ah thubuai ziah luh a ni," a ti.
Thubuai chhui turin CID (Crime) SP kaihhruaina hnuaiah Special Investigation Team (SIT) din a nih thu sawiin Anil Shukla chuan, "Ngawrh takin an chhui. Bultumtu ber chu MMFSL, Mizorama area business manager Jakir Hussain (41), Tejpur, Assam tih an hre chhuak," a ti a, thubuai kaihhnawihah Jakir Hussain bakah a thurualpui mi 10 man an nih tawh thu a sawi.
DGP sawi danin, Jakir Hussain hi MMFSL, Aizawl Branch-ah area business manager a ni a, Tuikhuahtlangah mi in luahin a awm. Kum 2020 vel aṭang khan car loan a tichingpen ṭan a, a tirah chuan tlemtê tiin, a hnuah huang a zauh tial tial. A thurualpuite nen document lem an siam a, document lemte hmang chuan MMFSL aṭangin car loan an la ṭhin a, car erawh lei a ni ngai lo a, car loan (pawisa) an lak chu an nei ta ṭhin a ni.
Document lem an hmante hming hian rinhlelh an hlawh lohna atan a khát tawkin car loan chu tlem tlemin an rûl ve ṭhin. MMFSL lam chuan a tirah rinhlelhna an nei lo a, mahse, Mizoram mihring zat aṭanga chhûtin car loan mamawh an tam lutuk chu an ringhlel a, Jakir Hussain-te thil tih chu an hre chhuak ta a ni.
Car loan hi document lem 2,000 vel hmangin an la chhuak hman a, sum an tihchingpen chu cheng vbc. 150 vel a ni.
Jakir Hussain hian sum tihchingpenna atan Mizoram Rural Bank, Khatla Branch-ah Mahindra Finance Ltd. tih hmingin account a hawng. Document lem siam turin Manoj Kumar a thawhpui a, Manoj hian document lem a siamnaah thla khatah Rs 15,000 a hlawh.
DGP chuan, thubuai chu chhui mek a nih thu sawiin, "Man belh tur an la awm mai thei. Pawisa chingpen zat pawh a la pung thei. Kan man tawh mi 11 zinga paruk chu Mizoram páwn mi an ni a, mi panga chu Mizoram mi an ni. Mi paruk chu thu zawhfiah atan police-in kan la kawl a, panga chu jail-ah dah an ni," a ti.
DGP chuan, car loan tihchingpennaah hian Aizawla car dealer - CK Motor Hyundai, NBE Tata, Rafael Nissan, Aidu Motors Renault, Standard Motors - Two Wheeler-te pawh an inhnamhnawih thu a sawi.
Car dealer-te an inhnamhnawih dan zawhna chhángin SIT member-te chuan, "He thil chungchang hi car dealer-te'n an hriatpui vek. An hnen aṭanga loan hmanga car pe chhuak angin an sawi a, mahse, an pe chhuak tak tak ngai lo. Kan chhui zui mek zel," an ti.