Vawk damlo talhtute lakah FIR thehlut

Animal Husbandry & Veterinary (AH&Vety) department chuan vawk pùl hri, African Swine Fever (ASF) léng chungchangah mipui hriat tur tichhuakin, vawk damlo a awm chuan toll free number 1962-ah ran doctor biakràwn theih a ni tih an tarlang. Vawk damlo talhtu mi pahnih lakah AH&Vety chuan FIR-ah an thehlut.

AH&Vety officer Dr C Lalzuitluanga chuan April 20, 2024 leh April 25, 2024-ahte vawk damlo talh a nih avangin Aizawl Police Station-ah FIR a thehlut a, dan anga hma la turin police a ngen.

FIR-a ziah danin, Kulikawn leh Salem Vengte chu April 17, 2024 khan ASF lenna hmun, infected area-ah puan a ni. Chuti chung chuan Sanghluna, Salem Veng chuan April 20 khan vawk damlo talhin a zuar tih thu an dawng a; Darchhuanthanga s/o Thanghluna, Salem Veng (Aizawl by-pass road) chuan April 25-ah vawk damlo a talh tih thu an dawng bawk.

AH&Vety department chuan, vawk damlo/ thi a awmin AH&Vety department-ah hriattir vat turin mipui an ngen a, "Vawk damlo chu dah hran vat tur a ni a, vawk damlo talh leh hralh khap tlat niin, ti luite chu hrem theih an ni. Vawk damlo sa reng reng mihring ei atan a him lo," a ti.

Nimin khan ASF vangin Salem Veng leh Kulikawnah vawk panga ve ve leh, Saitualah vawk pathum leh Dulte khuaah vawk pakhat a thi a; nimina vawk thi zat chhinchhiah chu 14 a ni.