Zirlaite'n an zirtirtu báng turin phût

Student Bar Council, Mizoram Law College chuan April 25, 2024 khan thuchhuah siamin, Mizoram Law College (MLC)-a assistant professor Lalhlimpuii chu a hna aṭanga báng turin an phût tih an tarlang.

MLC-a Student Bar Council chuan, Lalhlimpuii chu kum 10 chuang kal ta aṭangin MLC-ah a hna a thawk tawh lo a, hun eng emaw chen aikal a la tawh tih sawiin, "Aikal lâk phalna dan awm miah si loa hei chen dan a bawhchhia hi hriatthiam har kan ti a, law college-a thil thleng atan àwm lo kan ti hle a ni," an ti.

Student Bar Council (SBC) tarlan danin, Lalhlimpuii'n aikal a lâk chhan RTI Act tlawhchhana zawhna chhan-naah chuan, 'Married to IAS officer (Tamil Nadu cadre), suffering from diabetes' tih a ni. Aikal lâk chhan hi SBC chuan âwm lo an ti a, aikal lâk chhan tlingah an ngai lo a; dan bawhchhiatna a nih avangin Lalhlimpuii lakah sorkarin hremna lekkawh ngei se an duh a ni.

SBC chuan, "Pi Lalhlimpuii hi academic session thar, July 2024 hma ngeiin a hna hi bànsan turin kan hriattir a, a báng lo a nih chuan na zawka hmalak kan tum," an ti.

Mizoram sorkarin aikal lâk tihtawp tuma hma a la chu lawmawm an ti a, aikal lak tihtawpna tura chief minister Lalduhoma leh DPAR minister K Sapdanga te hmalakna an thlàwp tlat thu an tarlang bawk.