KHAWTHLIR

Bial inkhawmpui

Mizoram Presbyterian Kohhrana pastor bial inkhawmpui chu nizan khan bial hrang hrang­ah ṭan a ni a, naktuk Pathianni zanah a ṭiak ang. Nizan khan palai lawmna leh report in­khawm neih a ni a, vawiin­ah rorel a ni ang. Nikum report-a a lan danin, Mizoram Synod hnuai­ah pastor bial 298 leh kohhran 1,139 a awm.

MPSC pisa hawng

Mizoram Public Service Commission (MPSC)-in sorkar hna thawk tur a lak dan chhui chian a nih avanga hun eng emaw chen MPSC pisa khâr a nih hnuah, chhui hna zawh a nih tawh avangin nimin aṭang khan dan pangngaiin MPSC pisa hawn leh ṭan a ni.

Chin Baptist-in lawmthu sawi

Chin Baptist Church (CBC), USA hruaitute chuan nimin khan Central YMA pisa an tlawh a, Mizorama Myanmar raltlante YMA-in an lo buaipui avanga lawmthu sawina atan CYMA-ah Rs 1,00,000 an hlan. CBC hruaitute hi CYMA president Lalhmachhuana leh hruaitu dang ten an lo dawngsawng a ni.

Kawngpui zatve khâr ṭhin dawn

Bawngkawn Lunglei road (Aii Pûk) hnuai aṭanga Edenthar Veng inkar kawngpui chu PWD-in an siam dawn a, hei vang hian Aizawl Traffic SP Stephen Lalrinawma chuan April 29, 2024 aṭangin hna thawh zawh hma chu ni tin chawhma dar 10 aṭanga tlai dar 3:30 inkarah kawng zatve khâr ṭhin a nih dawn thu a tarlang.

Chakhei draft roll

Mara Autonomous District Council (MADC)-a Chakhei MDC biala by-election neih tur atan hman tur draft electoral roll chu nimin khan electoral registration officer M Misael-a'n a tlangzarh. Chakhei bialtu MDC K Hrahmo chu MLA a nih tak avangin MDC a nihna a kalsan a, by-election neih a ngai dawn a ni.

Tualchher criticism

C Lalawmpuia Vanchiau kutchhuak lehkhabu, 'Tualchher Criticism' tih chu nimin khan Prof. Margaret Ch. Zama’n MZP Conference Hall-ah a tlangzarh. Lehkhabu-ah hian thu hlawm 16 a awm a, phek 272-a chhah niin, Rs 350 man a ni.

Zirlaite tlawhpui

Kawlkulha Comprehensive Middle School zirlai leh zirtirtu mi 58-te chuan nimin khan Khawzawl DC Office an tlawh. Khawzawl DC pisaa thawkte chuan an hnathawh dante an lo hrilhfiah bakah, meeting hall, auditorium leh office branch hrang hrangte an fanpui a ni.