ZPM sorkarin vbc. 233.31 an ti-lapse - Robert Romawia Royte

MNF adviser Robert Romawia Royte, MLA chuan, ZPM kaihhruai sorkarin SASCI sum vbc. 233.31 an ti lapse nia sawiin, Mizoram tan chànna nasa tak a nih thu a sawi.

Nimina Mizo Hnam Runa MNF inkhawma thu sawitu Robert Romawia chuan, "SASCI sum kum liam ta 2023-24 chhunga vbc. 700 sanction tawhah vbc. 233.31 a lapse a, October 6, 2023-ah first instalment dawn a ni tawh a, thawk tura ruahman tawh chu ZPM sorkarin sorkar hmasaa dan ang thlapa contractor a thlante a thawhtir duh loh avangin a lapse ta a ni," a ti.

Robert Romawia Royte chuan, ZPM sorkar chu mipui sorkar din tura an inzawrhna letling thawkin an khawsa nia sawiin, "VC/LC tih tura langte an party unit-te'n an khawih a, mipuiin an ning chho ṭan mek. An sorkar tirha an riwkpui hlut Lengpui Airport tihral chungchang pawh a reh leh ta. Sorkar enkawl kawnga an arkhawthim daizia a lang chho zel a ni," a ti a; ZPM chu mipui rilru a ṭha lo zawnga hruai kawnga taima hleah a puh.

Ramri hung leh free movement regime tihtawp chungchangah sorkar laipuiin Mizoram chu zuam chi tinrengin a zuam nia sawiin Robert Romawia chuan, "CM dawihzep rah a ni chho ta zel. Kan sorkar hian dâwih aw pu mah se, MNF chuan huai takin kan bei zel dawn a, ZPM sorkar chu ram tana chhiatna tura an pênnaah na takin kan do dawn a ni," a ti.

MNF Adviser chuan, ZPM sorkar hnuah state sorkar sum hnár lian ber GST-a sum hmuh a tlakhniam thu te, MNF sorkarin SEDP dawngtu tur chhungkaw 60,000 a thlan vek tawh leh sum sem tur peih vek tawh chu ZPM sorkarin an ṭhiah vek thu te, thlai thar leina atana cheng vbc. 110 an dah aṭangin pakhat mah an lei loh thute a sawi bawk.

MNF adviser dang Dr Vanlalṭanpuia pawhin thu sawiin, "MNF thahrui lian ber Mizo nationalism chu hmasawnna milin na takin kan kalpui zel dawn. Kan ram, kan hnam leh kan sakhaw humhim hi kan tum bulpui ber ni rengin, Zo fate rorelna pakhat hnuaia awm hi kan tum ram, Pathian hruaina hnuaia thlen kan la tum tlat a ni," a ti.