ZPM sorkar an duhkhawp loh avangin mipuiin Congress an enthla mek - Thanzara

Mizoram Pradesh Congress Committee (MPCC) president Lal Thanzara chuan, ZPM kaihhruai sorkar chu mipuiin an duhkhawp loh avangin Congress party an enthla mek niin a sawi.

Lal Thanzara hian nimina Congress Bhavan-a political session-ah thu sawiin, "Tuna rorel lai ZPM hi mipuiin an duhkhawp lo hle a, keini party hi min enthla mek. Mipui tam takin Congress-ah rinna an nghat leh ṭan mek a ni. Kan insiamṭhat zel a hun a, kan thawhhona a ṭhat poh leh Pathian hian mal min sawm turin a inring reng a ni," a ti.

MPCC Prsident chuan, "Kum 60 chhungin engmah an thawk lo tiin Modi-a'n Congress a puh ang chiahin, ZPM hotupa hian kum 40 chhungin MNF leh Congress sorkar inchhâwkin engmah thawk lo angin min puh. ZPM hotupa mizia leh BJP hotupa mizia hi a inang hlein ka hria," a ti a; remna leh muanna a awm theih nan Congress party-in nasa takin hma an lak thu te, MNF tihṭhuanawp tawh Tuirial HEP leh Referral Hospital-te an tihpuitlin leh thute a sawi.

ZPM-in an term an hmang zo lo ang tia sawi a tam nia sawiin Thanzara chuan, "Anni hun zawhah hian MNF an ni ang ti an awm mang lo. Kan sorkar hrawn mek hian sum ngah inti hle siin hmunphiah a lei thei lo a, thingtlang lamah sawhthing an chíng nasa hle a, sawhthing hi hmunphiah anga an lei loh an hlauh thu sawi an tam hle," a ti.

Lal Thanzara chuan, MP inthlan atana campaign laiin harsatna lian tham tâwk an awm lo tih sawiin, "Congress party inlungrual takin kan campaign a, Pathian kaihhruaina a ni tih chiang takin a lang. Kan tling a nih chuan kan inlungrualna vang a ni ang a, kan tling zo lo a nih pawhin MLA inthlan ai khan hma kan sawn ngei turah kan ngai," a ti a; MNF an tlin chuan ZPM rilru a na hle dawn a, ZPM an tlin chuan Parliament-ah NDA lamah an ṭhu ngei dawna a lan thu a sawi.

Lok Sabha inthlana Congress party candidate Lalbiakzama pawhin thu sawiin, BJP-in seat 400 chuang la tura an inbeisei chu an sawi ngam tawh lo a, Congress leh a thurualpuite an hlau hle niin a sawi a, "Kan dinnaah kan ding nghet a, kan tumah kan chiang. Zoram mipui hian Congress-ah rinna an nghat leh ta hle tih ka hriat hian ka lawm hle a ni," a ti.