Thlan chhuahte invulh kum a ni zawk - PC President

PC party hruaitute chuan nimin khan an pisaah thuthar thehdarhtute an kâwm a; ZPM sorkarin insawhngheh kum (year of consolidation) a puan chu thlan chhuahte invulh kum (year of consolidation for the elected) ni zawka a lan thu an sawi.

PC president Vanlalruata chuan, Assembly Speaker-in lirthei thar a lei nia sawiin, "Inrenchem sawi uarin, year of consolidation an sawi nasa a, CM tiama minister-te'n motor pakhat an kawl tur thu te, motor an lei loh tur thute an sawi nasa. Motor pakhat aia tam an kawl hlawm ni mai loin, Speaker phei chuan motor changkang lutuk, cheng nuai 28 man vel a lei der tawh," a ti.

Sorkar chu mipui tana hlâwkna ni turin mipuiin an duh thu sawiin Vanlalruata chuan, "Thlan chhuahte tana hlâwkna a ni leh tho hi a pawi kan ti. PC party chuan mipui tan nasa takin hma kan la dawn," a ti a; ZPM kaihhruai sorkarin budget a siam hmasak berah minister leh MLA-te invulhna tur uchuak tak a lang niin a sawi.