MJA President-in mini ATM a tlangzarh

Mizoramah mini ATM (automated teller machine), RNFI Services siam chu kalpui ṭan a ni a, January 18, Inrinni khan MJA president Zonunsanga Khiangte-in Aizawl Press Club-ah a tlangzarh.

ATM khawl tê chi tlangzarh inkhawm hi MJA president hlui Vanlalrema Vantawl-in a kai­hruai a, RNFI state head Urmil Paul-a'n a telpui. Tlangzarhtu Zonunsanga Khiangte chuan, hun leh thâ sên tlem zawk theihna tura pawisa lak chhuahna Mizorama hman a ni ta chu lawm­awm a tih thu sawiin, mipui tana ṭangkai tak a nih avangin thingtlang khaw hrang hrangah awm thei se a duhsak thu a sawi.

MJA President chuan, mini ATM chu sumdawnna a nih rual­in mipui rawngbawlna a ni tih sawiin, "Aizawlah ATM booth 120 vel a awm niin an sawi a, thla tàwp leh thla thar sorkar hlawh lâk lai phei chuan ATM-ah intlar an tam ṭhin a, hmanhmawh thilah a buaithlak ṭhin. Chuvangin, mini ATM hi a tam thei ang ber awm thei se a duhawm hle," a ti. Mini ATM retailer tan tih tak tak leh tui chilh a pawimawh dawn thu sawiin, "Rintlak ni tur chuan pawisa lâk tur leh pêk tur neih ve reng a ngai dawn a ni," a ti.

Mini ATM hi RNFI Services siam chhuah niin, mobile phone tiat vel lek, duh duhna hmuna ken kual theih a ni a, Mizorama super distributor chu Sellai Agency a ni. Pawisa lak chhuah theih zat chu ATM booth pangngai nen a inang a, balance en, ticket booking, payment leh insurance chi hrang hrang tih nan a hman theih bawk.

Mini ATM hi India ram hmun tam takah hman a ni tawh a, recognised retailer hnenah ATM card (debit card) hrût (swipe) in, chumi hnuah ATM PIN number chhut luh tur a ni a, pawisa lak chhuah duh zat chu retailer-in a pawisa (cash) kawl lai aṭangin a pe ang. ATM booth-a pawisa lak ang thoin, pawisa lak chhuah rualin mobile phone number-ah SMS a thleng nghal ṭhin. Distributor hi Aizawl khaw­puiah pali, district khawpuiah pahnih leh khaw lian deuhah a remchang dan angin an awm thei a; super distributor, distributor leh retalier-te'n hlâwkna (commission) an nei ve dawn a ni.