Indo-Myanmar ramri khâr dawn lo

India/Mizoram leh Myanmar ramria inkalpawhnate chu May 1, 2024 aṭangin khâr tura ruahman ni tawh mah se, khâr a ni dawn rih lo.

Tarlan tawh angin, India leh Myanmar ramri vengtu Assam Rifles hotute chuan tun hnai khan Champhaia Darthlalang Tlanga an camp-ah YMA Sub-Headquarters, Champhai leh Champhai South leh North Joint Village Council hruaitute leh, Tlangsam, Zote, Ngúr, Ruantlang leh Hmunhmelṭha khawtlang hruaitute an kâwm a; May 1, 2024 aṭangin India leh Myanmar inkalpawhnate khâr a nih tawh dawn thu an hrilh a ni.

Vanglaini palai zawhna chhangin Assam Rifles hotute chuan, Mizoram leh Myanmar inrìnaa inkalpawhna kawngte chu May 1, 2024 aṭangin khâr a ni dawn rih lo tih an sawi a; chutih rualin, Myanmar lam aṭangin ruihhlo a lo luh nasat avangin ramri kâna kalte chu a ṭul angin uluk takin endik an ni ṭhin dawn tih an sawi.

Assam Rifles hotute sawi danin, MHA aṭanga thu an hmuh angin Lok Sabha inthlan vuakvêtah khan April 17 aṭangin darkar 48 chhung ramri an lo khâr tawh a, April 20-ah hawn leh niin, ṭul bik thil atan ramria inkalpawhnate chu an hawng leh a, May 1, 2024 aṭangin ramria inkalpawhna zawng zawng khâr tum a nih thu an sawi nghal bawk.

Hetih lai hian, May 1, 2024 aṭanga ramri khâr tum chungchangah hian Mizoram sorkar chuan sorkar laipui aṭangin hriattirna thu a dawn loh thu Home secretary H Lalengmawia chuan a lo sawi tawh a ni.