Tlawngah tui pump tur a tam tâwk rih; Aizawlah tui connection 78,000 vel a awm
Public Health Engineering (PHE) department chuan tunlai hian Tlawng lui aṭangin ni tin tui litre nuai 300 vel an pump ṭhin thu leh, tun dinhmunah Tlawng lui tui a tam tâwk rih thu an sawi. Aizawl khawpuiah tui connection 78,000 vel a awm mek a, kum 2023 khan tui connection 7,800 vel an pe.
Vanglaini palai zawhna chhangin PHE engineer-in-chief F Liantluanga chuan, Tlawng luia tui dinhmun a ṭha rih a, tunah hian Tlawng Reiek kaiah tui litre nuai 1,778.6 vel a awm thu a sawi.
PHE E-in-C chuan, Aizawlah cheng an tam zel avangin tui connection an siam sate'n mipui mamawh a phuhru pha lo tih a sawi a, "Tunah hian Aizawlah tui connection 78,000 vel a awm mek a, connection pakhat hi dan ang chuan inhman ṭâwm phal a ni lo a, mahse, chhungkaw tam takin an inhman ṭâwm nasa," a ti.
F Liantluanga chuan, tun hnaia thli tleh leh ruahsur vangin tui pump-ah harsatna an tawh thu leh hmun ṭhenkhatah thli tlehin tui pump kháwl châwmtu electric hrui a tihchhiat thu sawiin, "Darkar hnih/thum lek tui pump theih loh hian in recover turin ni eng emaw zat a duh ṭhin," a ti a, tun hnaia ruah leh thli thawk vanga power line chhia kha darkar 24 chhung vel an buaipui thu a sawi.
Greater Aizawl Water Supply Scheme (GAWSS) Phase-II chu diesel engine khawl pahnih a chhiat avangin power supply a awm loh chuan tui pump theih a nih loh thu sawiin Liantluanga chuan, "Kumin January 17 khan Pune-ah kan chah a, a kháwl kan chah hi siam sa a awm lo a, tui pump-na hmun leh pump chhuahna tur hmun hlat zawng azirin siam a ngai. Thla 6-8 chhung vel siam a nih ṭhin avangin August 2024 velah kan dawn hman kan beisei," a ti.
PHE E-in-C chuan, GAWSS Phase I leh II aṭangin ni tin tui litre maktaduai 30 vel an pump mek thu leh, GAWSS Phase-III erawh chu kháwlah harsatna awm rih lo mah se, tui khuahnaah harsatna a awm mek thu a sawi.
Phase III chu electric leh diesel hmangin hlawhtling takin enchhin a ni tawh tih sawiin F Liantluanga chuan, "Hetih lai hian tui khuahna sira inkalpawhna kawngpui a min a, estimate-a awm sa ni lo, khuarel chhiatna a nih avangin siamṭhat leh nan sumah harsatna kan tâwk. Tunah hian SASCI-ah sorkarin a siamna tur sum min tihsak a, kan buaipui mek," an ti.
PHE hotute chuan, GAWSS Phase-III tui khuahna bula leimin chu siam turin tui a tlem a ngaih thu leh tui pump a nih dawn chuan tui khuah tam a ngaih bawk si avangin hna thawh a theih dawn loh thu an sawi a; tui tlem tur chuan Tlawng lui bakah a fintu lui hrang hrangteah khua a ṭhata ruah a sur loh a ngaih thu te, khua a ro ṭhata tui a tlem chuan ni hnih/thum chhung lekin siam zawh theih a nih an beisei thu te an sawi bawk.