UPC (NEI) inkhawmpui a ṭiak
April 25, 2024 zan aṭanga Kolasib Vengthara ṭan, United Pentecostal Church (North East India) General Conference vawi 56-na chu nizan khan a ṭiak. Inkhawmpui thupui chu 'Ngai teh, ani chu a lo kal e' tih a ni.
UPC (NEI) inkhawmpui lianah hian April 27, Inrinni khan kum 2024-25 chhunga hruaitu turte thlan a ni a; general superitendent atan general secretary ni lai Rev. Zohmingthanzama, general secretary atan general treasurer ni lai Rev. Lalmalsawma Sailo leh treasurer atan general missions director Rev. R Laichhingpuia te thlan an ni.
April 26, 2024 chawhma khan General Missions, LAD leh Sunday School department-te'n hmun thumah general hruaitute hoin ro an rel a; chawhnu lamah General Board neih chhunzawm nghal a ni.
Inkhawmpui report bua tarlan danin, UPC-NEI hnuaiah hian district 12 leh mission field pahnih a awm a; he'ng hmunahte hian kohhran member 1,18,701 awmin, mipa 58,309 leh hmeichhia 60,392 an ni.