Muallungthu ram leh Samtlang rama vawk thi paih Vety hotute'n enfiah
Tun hnaiah Muallungthu ram leh Samtlang rama vawk thi paih thlalak social media-a tarlan chu April 27, Inrinni khan Animal Husbandry and Veterinary department hotute'n a hmunah an enfiah.
Muallungthu VC president Zonunsiama sawi danin, April 25, 2024 khan Muallungthu leh Tachhip inkara Zuanbak luiah vawk thi paih hmuh a nih thu an dawng a, a rang thei ang berin a hmunah kalin an enfiah tih a sawi a; vawk thi chu a lo puam hman tawh avang leh a rimchhiat tawh avangin thelret/polythene hmanga a theih ang anga an khuh hnuah an kalsan tih a sawi a ni.
AH&Vety department hotute leh Muallungthu khawtlang hruaitute chuan, vawk thi paih chu damdawi nena sâwngbàwl hnua phûm ni se an ti a; khawtlangah vawk hriléng chungchanga hriat tur pawimawhte a zau thei ang bera inhrilh darh ni se, an ti bawk.
Samtlang leh Lungleng khaw inkarah pawh kawng sirah vawk thi paih a nih thu an dawn bawhzuiin AH&Vety hotute chu Samtlangah kalin, VC hruaitute nen an inkâwm a; Samtlang VC president K Zahunga chuan, vawk thi paih a awm thu an hriat veleh VC-in hma an la a, vawk vulhtute ko khawmin, hmalak dan tur an sawipui thu a sawi.
Samtlang bul kawngpui sira vawk thi paih chu damdawi nena sâwngbâwla phûm an rel a, a phûmtu turte pawh hmanrua dik tak hmang chunga che tura tih an ni.
AH&Vety department hotute chuan, tun dinhmunah Muallungthu leh Samtlangah hian ASF vanga vawk thi report dawn a la ni lo a, vawk vulhtute chu chî-âi lo turin an chah.
Samtlang VC-te nena inkawmhonaah hian, mipuia hriat turin ASF chungchangah inzirtirna ṭha tak neih ni se an ti a; vawk thi a awmin paih mai lo a, Vety department hotute hnena a rang thei ang bera hrilh ṭhin tura puanzar ni se an ti bawk.