Rialin in chung a den chhiatte chhawmdawlna hmasa pek an ni
April 27, Inrinni zing dar 2 vel khan Khawzawl district-a Tualpui leh Vankal khuaah rial tlain chenna in chung eng emaw zat a déng chhia a, rialin a den chhiat in neitute chu Inrinni vek khan chhawmdawlna hmasa pek nghal an ni.
Tualpui khuaah hian chenna in 24 chung rialin a déng chhia a, Vankalah in 27 vel a déng chhia. Tualpui leh Vankal khuaa chenna in chung chhiate Village Level Disaster Management Committee kaihhruainain thawm ṭhat nghal a ni.
Khualrel chhiatna thleng a hriat veleh Khawzawl bawrhsap Lalrohlua chuan chhiat tâwkte chhawmdawl dan tur a ngaihtuah nghal a; Inrinni zan khan SDC Elijah chu Tualpui khuaah tír nghalin, chhawmdawlna hmasa atan tarpauline an sem. Khawzawl SDC hian nimin khan Vankal khua pan lehin, tarpauline a sem leh bawk.
Khawzawl DC chuan, rial tlain in chung a tihchhiatte chu endik vek a ni dawn tih sawiin, "Report azirin State Disaster Response Fund (SDRF) aṭangin tun karah ṭanpuina pek nghal tum a ni," a ti.
Chenna in chhiate chuan sorkarin an harsatna tawhte hriatpuia hma a la nghal zung zung chu lawmawm an tih thu thuneitute an lo hrilh.