MJA-te'n Assam leh Meghalaya-a silk pangang khawina hmun an tlawh

MJA, Serchhip district member 11-te chuan April 22-26, 2024 chhung khan Assam leh Meghalaya state-ah Sericulture Press Tour an nei a, state pahniha silk pangang khawi dante a hmunah an enfiah. April 26, Zirtawpni tlai khan bialtu MLA Lalduhoma, chief minister chu a pisaah hmuin, an zin chanchin an hrilh.

MJA, Serchhip district member-te hian Sericulture hmalak hlawhtlinna hmun - Fabric Plus, Guwahati, Chenglang, Bongaigaon, Bodoland Silk Park, Kokrajhar, Bhaoragwja Eri cluster leh Central Silk Board, MESSO leh Nongpoh-te an tlawh a ni.

MJA member-te hi Bodo Territorial Region Sericulture director Chakraborty leh director hlui Dr Jogesh Deori ten lo dawngsawngin, an hmalaknate an fanpui a; Mizorama sericulture hmasawnna turin an theihna zâwnah puih an inhuam reng thu an lo hrilh.

Mizoramah Muga silk khawia hmasawnna turin Sericulture department leh kuthnathawktute hmasawnna turin hand holding policy hmalak hlawhtling tak neih theih thuai an beisei thu MJA member-te chuan an sawi.

Serchhip MJA Press Tour hi Mizoram Sericulture department bultuma neih a ni a; Sericulture scientist Dr Lalthlamuana Pachuau leh promotion officer Lalduhsaki Ralte ten an kalpui. Central Silk Board, Guwahati-a scientist Bidyut Nath Choudhury-in an kal kualna zawng zawngah a hruai bawk.